Attock News - صحافتی برادری کی مشکلات

صحافتی برادری کی مشکلات

اگلے دنوں میرے ایک دوست جو خیبر ایجنسی لنڈی کوتل میں بہت سارے اداروں کے لئے بیک وقت اپنی صحافتی ذمہ داریاں ادا کر رہے ہیں نے اپنے ایک کالم میں قبائلی علاقوں کی صحافتی برادری کی مشکلات کا تذکرہ کیا تھا کہ اِن علاقوں میں ان کو میڈیا (پرنٹ اور الیکٹرونک) کے لئے خبریں اکٹھی کرنے کے لئے کیا کیا پاپڑ بیلنے پڑتے ہیں اور خود کو کن مشکلات میں ڈال کر خبر کی سچائی اور حقیت جاننا پڑتی ہے ، ان کو گرمی سردی ، دھوپ چھاؤں اور بارش میں دور دراز علاقوں کا سفر کرنا پڑتا ہے، طرح طرح کے لوگوں سے ملنا پڑتا ہے یہی نہیں بلکہ بعض اوقات ان کا ایسے لوگوں سے بھی واسطہ پڑتا ہے جن کے نزدیک ایک صحافی کی

عزت و توقیر کوئی معنی مقصد نہیں رکھتی مگر یہ بہادر اور جفا کش لوگ اِن حالات میں بھی اپنے وطن کے لوگوں کو باخبر رکھنے کے لئے اپنے فرائض پوری ایمانداری اور تندہی سے سرانجام دیتے ہیںاور کوشش کرتے ہیں کہ ان کی خبر سب سے پہلے ان کے ادارے کے توسط سے قارئین تک پہنچے اور اکثر کسی حد تک اپنی کوشش میں کامیاب بھی رہتے ہیں ۔
یہ تو ایک اس قبائلی صحافی دوست اور بھائی کی دکھ اور مشکلات سے بھری ہوئی داستان ہے مگر میرے سامنے تو وہ سارے صحافی ہیںجو اپنے فرائض پوری تند ہی سے سرانجام دیتے چلے آ رہے ہیں اور اپنے اس مشن میں اس قدرمضبوط ہوتے ہیں کہ اپنی جان کی بھی پروا نہیں کرتے، ابھی کل ہی کی بات ہے جب محترمہ بے نظیر بھٹو دوبئی سے کراچی اپنے وطن واپس آئیں تو ان کے پر امن جلوس میں بم دھماکے ہوئے تو اے آر وائی ون ورلڈ کے ایک کیمرہ مین اس میں شہید ہو گئے وہ بھی تو اپنے ٹی وی چینل کے توسط سے ہمارے لئے ہی کوریج کر رہے تھے مگر کیا ہوا، پیپلز پارٹی نے اس کے لواحقین کو پوچھا بھی نہیں، اگر کچھ مدد کی بھی تو اس وقت کی پنجاب کی حکومت نے اس کے والدین اور بہن بھائیوں کی خبر گیری کی۔ اسی طرح قبائل علاقوں میں بھی بہت سے واقعات ہوئے جن میں ایک طرف اگر ٹی وی چینلز کے نمائندے متاثر ہوئے تو دوسری طرف اخبارات کے صحافی بھی بچ نہ سکے اور یہاں بھی کچھ اپنی جان سے گئے اور کچھ اغوا بھی ہوئے، متاثرین میں سے کتنے ہیں جن کی بابت ان کے ٹی وی چینلز یا ان کے اخبارات کے مالکان نے ان کی دلجوئی کی یا ان کی مالی یا اخلاقی مدد کی ہو؟
ایسے ہی متاثرین میں سے میں یہاں فقط دو ایک واقعات کا ذکر کروں گا کہ ایک طرف تو یہ بے چا رے(میں ان کو بے چارے ہی لکھوں گا) اپنے فرائض سے غفلت نہیں برتتے کیونکہ اگر یہ لوگ غفلت سے کام لیں گے تو پھر ان کے کام کا مقصد ہی فوت ہو جاتا ہے تو دوسری طرف بعض اخباری اور ریڈیو ٹی وی چینل مالکان (ان میں بعض نام تو بہت ہی معتبر ہیں) نے ان کے حقوق غضب کئے ہوئے ہیں ، ان کو بہت ہی کم معاوضہ دیا جاتا ہے یا پھر کسی نہ کسی بہانے دبا لیا جاتا ہے، اس ضمن میں پہلا واقعہ میرے ایک ایسے دوست سے متعلق ہے جنہوں نے اپنی ساری عمر صحافتی اداروں کی خدمت میں گذار دی ہے اور اس وقت صاحبِ فراش ہیں ان کی قوتِ گویائی متاثر ہو چکی ہے جس کی وجہ سے آپ ٹھیک سے بول بھی نہیں سکتے صرف سن سکتے ہیں اور لکھ سکتے ہیں، کئی مہینوں سے اس موذی بیماری کے نرغے میں ہیں ، ڈاکٹروں کے مسلسل علاج کے باوجود بھی زیادہ افاقہ نہیں مزید یہ کہ ڈاکٹروں کے بقول مکمل شفایابی میں ابھی ایک سال کا عرصہ لگ سکتا ہے، اس صحافی دوست نے نے بتایا کہ دو بڑے اخباروں کے مالکان نے ان سے تحریک پاکستان کے حوالہ سے باقاعدہ طے کرکے مضامین لکھوائے جن میں سے ایک کے مالک آج کل کرتے ہوئے اللہ کو ہی پیارے ہوگئے ، یہ اخبار ان کی وفات کے فوراً بعد مسلم لیک (ن) کے ایک رہنما نے خرید لیا ہے جس کی بنا پر جہاں ان صاحب کا معاوضہ بھی ڈوب گیا وہاں بہت سے دوسرے اخباری کارکنان کے ساتھ ساتھ دوسرے دوست کی دو ماہ کی تنخواہ ہی ماری ہی گئی اور ساتھ ہی ان کو اخبار سے بھی الگ ہونا پڑا ، جس پر ان کو ایک اور نامور صحافی کے اخبار میں ملازمت مل گئی اور اب تیسرا مہینہ ہے کہ وہاں سے بھی تنخواہ نہیں مل سکی ۔
دوسرا واقعہ حال ہی میں کھلنے والے ٹی وی چینلز میں سے ایک ٹی وی چینل سے متعلق ہے جنہوں نے میرے ایک ایسے صحافی دوست سے رابطہ کیا جو پہلے سے ہی خیبر ایجنسی میں کام کر رہے تھے۔ اس ٹی وی چینل نے ان کو ایک معقول معاوضے پر خدمات سرانجام دینے کیلئے رکھا مگر افسوس کہ انہوں نے بھی اپنی ذمہ داریوں سے پہلو تہی کی اور اس بچارے غریب صحافی کا معاوضہ دبا لیا۔ اس صحافی کے بارے میں مجھے کسی اور نے نہیں بلکہ خود اس صحافی نے بتایا کہ کسطرح اس کے ساتھ اس ٹی وی چینل کے مالکان نے زیادتی کی۔
اس صحافی نے نہایت دکھی دل سے میرے ساتھ بات کرتے ہوئے کہا کہ ایک طرف ہمارے علاقوں میں آپس کے گروہی اور مسلکی لڑائی جھگڑوں کے ساتھ ساتھ اتحادی طیاروں کی آئے روز کی بمباری کی صورت میں تباہی و بربادی نازل ہو رہی ہے جس کی بنا پر، کاروبار ٹھپ ہو چکے ہیں اکثر اسکول کالجز یا تو بند ہو چکے ہیں یا ان کو گرایا /جلایا یا بارود سے اڑایا جا چکا ہے، عورتوں کے لئے روز مرّہ کے معمولات بجا لانا بھی از حد مشکل ہو چکے ہیں دوسری طرف اسلام کانام لینے والے ان کی زندگی اس صورت میں حرام کر رہے ہیں کہ اسلام کے نام پر طرح طرح کی پابندیا ں لگائی جا رہی ہیںکہ یہ نہ کرو وہ نہ کرو وغیرہ وغیرہ مزید یہ کہ جو لوگ ہم سے اپنے اخبارات اور ٹی وی چینلز کے لئے کام لیتے ہیں وہ کام کے بعد تنخواہ ہی نہیں دیتے الٹا ڈراتے دھمکاتے ہیںغرض مرے ہوؤں کو مارنے پر وہ لوگ بھی تل گئے ہیں جو کام لینے کے بعد معاوضہ دینا بھی پسند نہیںکرتے، میں اس کالم کے توسط سے ان تمام اخبارات اور ٹی وی چینلز کے معزز مالکان کی خدمت میں ارض کرنا چاہوں گا کہ اپنے سامنے ہمیشہ آنحضرت صلی اللہ علیہ وسلم کی وہ نصیحت رکھیں کہ مزدور کو اس کی مزدوری اس کا پسینہ خشک ہونے سے پہلے ادا کرو، اگر آپ ایسا نہیں کر رہے تو پھر یاد رکھیں کہ آپ اللہ کے رسول ہی کے نافرمان نہیں ٹھہریں گے بلکہ اللہ کے نافرمان بھی کہلائیں گے اور کیا آپ خدا اور اس کے رسول کے نافرمان ہونا پسند کریں گے؟

14-07-2008 16:45 M Afzal Qamar Published in Articles, Urdu Articles

This entry was posted on 14-07-2008 16:45. You can follow any responses to this entry through the RSS 2.0 feed. This article was favoured 9 time. You can leave a comment.
Views: 953

Users' Comments (0)

Average user rating

(0 vote)

Comment an article

No comment posted

< Prev		Next >

[ Back ]

Report Time	07:00
Condition	---
Wind Chill	---
Dew Point	20°C
Wind Direction	000
Variable Wind	---/---
Wind Speed	---
Wind Gust	---
Visibility	6.0 km
Pressure	1006hpa
Humidity	83.2%
Hum. Index	30.4°C
Heat Index	22°C
Precipitation	---
Snow	---

Hijri Date

Member Login

News Archive

Attock Poll

Attock Weather

Tell a Friend

Syndicate


Attock 23°C